LESARBREV: Aftenbladet har det travelt og tek i ein leiarteig (31. mai) til orde for å følgje Vegvesenet si tilråding om å la Eiganestunnelen munne ut ved Byhaugen. Ifølgje avisa vil ei slik løysing, trass negative miljøkonsekvensar, bli mindre «belastende» enn ei utsetjing av prosjektet.
Til grunn for vurderinga ligg frykt for kapasitetsproblem på E39. Merkeleg er det då at ein samstundes argumenter med at betre «kollektivløsninger» vil minske «trafikkbelastningen» meir enn ein forlenga tunnel. Tanken synest altså å vere at trafikken i framtida vil bli så mykje større at ein ikkje kan vente med å byggje Eiganestunnelen, men samstundes så mykje mindre at det for bebuarane ikkje vil vere noko problem at han går i dagen. Ein slik logikk er det ikkje vidare lett å bli klok på.
At Aftenbladet skyt seg sjølv i foten, blir endå tydelegare om vi går litt tilbake i tid. Eit hovudalternativ frå konsekvensutgreiinga i 2001 var nemleg å utvide busstilbodet i staden for å byggje tunnel. Sjølv om dette framlegget no diverre er lagt daudt, burde det ikkje by på særlege problem å auke kollektivdelen tilstrekkeleg til at ein kan tole at tunnelen dryger endå nokre år. Ein slik politikk vil òg komme bymiljøet til gode etter at Eiganestunnelen er ferdigstilt, då han permanent kan få opp bussbruken.
Når ein med såpass enkle grep kan unngå den frykta «vegkrisa», verkar det unaudsynt korttenkt å haste av garde. Ein kort Eiganestunnel vil for all framtid lage eit stygt sår i eitt av dei viktigaste friområda i kommunen, medan det lange alternativet vil vere vesentleg mindre inngripande både for naboar, turgjengarar og dyrelivet ved Stokkavatnet. Billigløysinga Aftenbladet og bystyrefleirtalet føreskriv, er såleis ein usedvanleg dårleg medisin med særs uheldige biverknader. Bymiljølista er i alle fall ikkje i tvil om at ei forbigåande forkjøling er langt å føretrekkje framfor ein støyande amputasjon av byens kanskje flottaste grøne lunge.
Mats Indrefjord Høllesli,
1. kandidat for Bymiljølista i Stavanger
Bymiljølista vil verne om friområdet ved Stokkavatnet og bomiljøet på Smiene. Les mer 
0 Svar til “Korttenkt forsvar for kort tunnel”